भोर निकुंजनि-आँगन-बीच लसैं बिलसैं हुलसैं पिय-गोरी |
आनन राजत पाननि-रंजित पाननि-कुञ्ज-छुबैं कुच-कोरी ||
बंक निहोरत भौंह मरोरत नैननि-बैंननि माँझ ठगोरी | 
श्री मुख श्री हरिवंश भनी नित सो हित रूप सनी यह जोरी ||

खिचरी जेंवत जुगल किशोर।
निसि जागे अनुरागे दम्पति, उठे उनीदे भोर।।
अंग-अंग की छवि अवलोकत ग्रास लेत मुख सुखहि निहोर।
जै श्रीरुपलाल हित ललित त्रिभंगी विवि मुख चन्द्र चकोर।।

हिम  की  रितु  सीत के  जीतबे  कौं  कुंजलाल  भोग  धरी  खिचरी  ।
बहु  मेवन गेर  सुगन्ध  सौं  महकी  अतिसय  धृत  सौं  निचुरी  ।।
दधि  दूध  मलाइ  अरोगत  हैं  रस  लम्पट  बात  करैं  विचरी  ।
ध्रुव बाँटत  श्रीहितरुप अलि , जै श्रीलालकिशोरी  जू  यौं  उचरी  ।।

खिरक बिच क्यों ठाड़ी राधा प्यारी ।
माथे हाथ दिए मन सोचत, कहाँ लगी तेरे प्यारी ॥
देखेंगे सो कहा कहेंगे, सुन वृषभान कुमारी ।
अब ही लाल गये गोअन में, आवन की है तैयारी ॥
बंसी बाज रही मोहन की, मोहि लई बृजनारी ।
“चन्द्रसखी“ भज बालकृष्ण छबि, तन मन घन बलिहारी ॥