खिचरी जेंवत जुगल किशोर ।
निशि जागे अनुरागे दम्पति, उठे उनींदे भोर।।
अंग अंग की छवि अवलोकत, ग्रास लेत मुख सुखहि निहोर।
जय श्री रूपलाल हित ललित, त्रिभंगी विवि मुखचन्द्र  चकोर।।

खिचरी जेंवत है पिय प्यारी।
सीत समै रूचि जानि सुगंधन, मेलि सखीनु संभारी।।
पहिले प्रियहि पिवावत जेंवत, रसिक नरेश महारी।
जै श्री कंचन लाल प्रिय की, बातन की घातन जानन हारी।।

शयन भोंग लाई भर थारी।
रूचिर कचौरी पुआ पूरी, मोहन भोग जेंवत पिया प्यारी।
धरे कटोरा भरे मुरब्बा सरस संधाने बर तरकारी।
ओंट्यो दूध रजत भाजन में, तामध पीस सिता बहु डारी।।
ललिता ललित करन अंचवावत, जमुना जल कंचन की झारी।
जै श्री हित बृजलाल पवावत बींरी, दम्पति छवि सम्पति उर वारी।।

हॅंस हॅंस दूध पीवे गोपीनाथ।
मधुर कोमल वचन कहि कहि, प्राण प्यारी के साथ।।
कंचन कटोरा में धरयो है अमृत, लियो श्री ललिता हाथ।
लाडली अचवावत पहिले, पाछैं आप अघात।।
चिंतामणि चित बस्यौ है सजनी, निरखि नैन सिंरात।
श्यामा श्याम की युगल छवि पर, रसिक जन बलि जात।।

अचमन करत किशोर किशोरी।
अचमन कर चौकी पर बैठे, भली ये विराजत जोरी।।
खिरचा देत रंगदेवी जू, अलबेली बपु बहर झकोरी।
श्रीहित सखि हरि हाथ अगांेछत, हरिप्रिया करत किलोली।।
सेवा सखिंया युगल छवि निरखत, ले दरपन एक ओरी।
दूल्हा श्री घनश्याम लाडले, दुल्हन राधा गोरी।।
परमानन्द दास को ठाकुर, बीरी देत कर जोरी।।

बीरी नवल ग्वालिन लाई।
चूना कत्था लोंग सुपारी, अतर सुगंध मिलाई बीरी।
हॅंस हॅंस पान खवावत श्रीललिता, सखी देख मुसकाई।
पान खाय मिल बैठे दोउ, चौपर खेले रचाई बीरी।
सुन्दर सेंज सॅंवारी श्री ललिता, सूरशरण बलि जाई।

लेते जइयो, ओ सांवरिया बीरी पानन की ।
बीरी पानन की सनमानन की ।।
चूना कत्था को लगायै, सुन्दर बीरी को बनाये।
लाला ऐसी लगाई सनमानन की ।।
आओ कृष्ण/श्याम मिल चौपर खेले।
बाजी लगाउ गुरू ग्यानन की।।
हारूगीं तो तुमरे संग चलूंगी।
जीतीं तो बेटी बृषभानन की।।
पुरषोत्तम प्रभु जी की छवि निरखत।
जोडी बनी है राधेश्यामन की।।