आवति नेह की निधि प्यारी ।
रोम-रोम सुखदैंन स्याम कौं, श्रीवृषभानुदुलारी ॥
प्रथम समाज साज सचि संपति, अंग-अंग सुकुमारी ।
नव निकुंज नागरी-रवन मिलि, सुरस-सार वरषा री ॥
देत असीसनि निरखि जुवति, चिरु जोरी सदा-सदा री ।
श्रीगुरुराज-कृपा तें या छबि पर 'कल्यान' बलिहारी ॥ 

बरसाने वृषभान गोप घर सोभा की निधि आई री।
धनि-धनि कूख महरि कीरति की जिन यह कन्या जाई री॥
अखिल लोक भुव लोग में देखी सुनी न निकाई री ।
सिंधु सुता गिरि सुता सची रति नहिं समान कोऊ पाई री॥ 
आनन्द.मुदित जसोदा रानी कान्हर की करौं सगाई री। 
प्रभु कल्यान गिरधर की जोरी विधना यहै बनाई री॥