सब सुख सदन बदन तुव राधे।
उपमा कमल ससी नहिं पावत, मीत मान अपराधे ।।
मृदु मुसक्यानि हरत मन नैनन, बंक बिलोकन ही दृग आधे।
लेत बलाय दुहुँ कर भगवत रसिक सिरोमनि गुननि अगाधे ।।

खेलत फाग सुहागभरी अनुरागहिं लालन कौं झरि कै।
मारत कुंकुम केसरि के पिचकारिन मैं रंग को भरि कै।
गेरत लाल गुलाल लली मन मोहिनी मौज मिटा करि कै।
जात चली रसखानि अली मदमत्‍त मनी-मन कों हरि कै।।

होली के खिलैय्या यार, फागुना जाय मत रे
होरी चली अपने बाप के रे, रसिया सोय गयो पाँव पसार
होली के खिलैय्या यार, फागुना जाय मत रे
चिरंजीवो होली के रसिया, फागुना जाय मत रे

दान दै री नवल किसोरी |
माँगत लाल लाड़िलौ नागर, प्रगट भई दिन दिन की चोरी ||
नव नारंग कनक हीरावलि, विद्रुम सरस जलज मनि गोरी |
पूरित रस पीयूष जुगल घट, कमल कदलि खंजन की जोरी ||
तोपैं सकल सौंज दामिनि की, कत सतराति कुटिल दृग भोरी |
नूपुर रव किंकिनी पिसुन घर, ‘हित हरिवंश’ कहत नहिं थोरी ||51||

देखौ माई सुंदरता की सीवाँ |
व्रज नव तरुनि कदंब नागरी, निरखि करतिं अधग्रिवाँ ||
जो कोउ कोटि कोटि कलप लगि जीवै रसना कोटिक पावै |
तऊ रुचिर वदनारबिंद की सोभा कहत न आवै ||
देव लोक भूलोक रसातल सुनि कवि कुल मति डरिये |
सहज माधुरी अंग अंग की कहि कासौं पटतरिये ||
(जै श्री) हित हरिवंश प्रताप रूप गुन वय बल स्याम उजागर |
जाकी भ्रू विलास बस पसुरिव दिन विथकित रस सागर ||52||

जोगी रंग भीना आया, अच्छा श्रृंगी नाद बजाया।
मोतिन लर अलकन संगा, मानो जटाजूट मे गंगा।।
जोगी रंग भीना आया, अच्छा श्रृंगी नाद बजाया।

मलयागिरी चन्दन/भस्म विराजे, मानो सुर डमरू बाजे।
जोगी रंग भीना आया, अच्छा श्रृंगी नाद बजाया।।

जोगी छबि वाबरो डोले, राधे-राधे राधे बोले।
जोगी रंग भीना आया, अच्छा श्रृंगी नाद बजाया।।

मोहन मंत्र फूंक दे मारी, सब बृज मोहनी डारी।
जोगी रंग भीना आया, अच्छा श्रृंगी नाद बजाया।।

जोगी सब संतो का प्यारा, शरण मलूक ने माना।
जोगी रंग भीना आया, अच्छा श्रृंगी नाद बजाया।।

बैठे नाव विहरत पिय प्यारी ।
आवत तहां सुगंध मनहरनी, यमुना जल सुखकारी ll 
लाल धर्यो अंबर अति झीनो, माथे पाघ धरी मनोहारी l
गल पहुपन के हार मनोहर, प्यारी के तन पहुपन सारी ll 
सुन्दर श्याम आप ही खेवत, करत बात अपने जियवारी l
‘श्याम-ग्वालिनी’ रीझे परस्पर, अखियन अंखियाँ डारी ll

बड़ो पर्व त्यौहार दिवारी।
विविध शृंगार कियो लरिकन को, रोरी तिलक सोहत भारी।।
कंचन थाल साज ब्रज बनीता, नंदराय घर आयी।
पुलके दिप समीप सोंज भर , गावत गीत सुहाई ।।
श्रीविट्ठल गिरिधरन लाल छबि संग, अंग अधिकाई।
यह शोभा कछु कहीन परत है, देखत रही मुसकाई।।

गोकुल को कुल देवता प्यारो गिरिधरलाल।
कमल नयन घन सांवरो वपु बाहु विशाल।।
बेग करो मेरे कहे पकवान रसाल।
बलि मघवाबल लेत है कर कर घृतगाल।।
इनके दिये बाढ़ी है गैया बच्छ बाल।
संग मिल भोजन करत है जैसे पशुपाल।।
गिरी गोवर्धन सेविये जीवन गोपाल।
सूर सदा डरपत रहे जातें यमकाल।।

गोवर्धन पूजन चलेरी गोपाल l
मत्त गयंद देख जिय लज्जित निरख मंदगति चाल ll
व्रज नारिन पकवान बहुत कर भर भर लीने थाल l
अंग सुगंध पहर पट भूषण गावत गीत रसाल ll
बाजे अनेक वेणु रवसो मिलि चलत विविध सुर ताल l
ध्वजा पताका छत्र चमर धर करत कुलाहल ग्वाल ll
बालक वृंद चंहुदिश सोहत मानो कमल अलिमाल l
कुंभनदास प्रभु त्रिभुवन मोहन गोवर्धनधर लाल ll